الشلل النصفى

معنى hemiplagia

ماهو الشلل النصفى؟
هو شلل فى نصف عضلات الجسم ابتداء من عضلات الوجه وعضلات الطرف العلوى والطرف السفلى وعضلات البطن
ماهو سبب الشلل النصفى؟
فى كذا سبب للشلل اهمها الجلطات , بتتكون جلطه فى الدم وتوصل الجلطة لشريان فى المخ وتسد الشريان فبيموت جزء من المخ ده بيسبب شلل نصفى فى اسباب تانية لكنها اقل ونسبه حدوثها اقل وهى النزيف الداخلى بالمخ نتيجة حادث او اصابة
واهم الفحوصات المطلوبه فى هذا المرض هى الاشعة المقطعية واشعة الرنين المغناطيسى واللى بتحدد مكان الاصابة فى المخ او جزع المخ او الحبل الشوكى وده اللى بيحدده الطبيب المعالج
العلاج
اهم شىء فى العلاج هو الاهتمام بالحالة العامه للمريض فلازم يتم غسيل جسم المريض بانتظام بكحول مطهر ثم وضع بودره تلج كمان لازم يتركب للعيان قسطرة بول وبراز وبالنسبة للادوية فده بيتحدد حسب سبب الشلل النصفى فلو كان مثلا السبب هو الجلطه _وهو الغالب_ فبندى للعيان الادوية المدوبة للجلطات ونمنع حدوث جلطات جديدة ومن اهم الادوية اللى العيان بياخدها فى العلاج هو الاسبيرينaspirin و ticlid
وبرضو العلاج الطبيعى بيجيب نتيجة فى كتير من الحلات

التهاب الاغشية السحائية meningitis

ماهو التهاب الاغشية السحائية:
معنى meningitis
هو عبارة عن التهاب قى الاغشية المحيطة بالمخ وهى ثلاثة اغشية الحنون والجافية وطبقة وسطى وظيفة هذه الاغشية انها تحيط الجهاز العصبى(المخ والحبل الشوكى) كله وبداخلها السائل المغذى للمخ
الالتهاب ده غالبا بيكون بسبب بكتريا تسمى (meningicoci ) وفى بعض الاحيان بيكون سبب الالتهاب فيرس بس ده مش الغالب
العدوى بهذه البكتريا بيكون عن طريق النفس او الرزاز من شخص مصاب او حامل للبكتريا فى الحلق وده بيكون غالبا فى الاطفال بسبب التكدس فى المدارس وضعف المناعة
الاعراض:
ارتفاع فى درجة الحرارة نتيجة الالتهاب , زيادة فى النبض, قىء مفاجىء,زغللة فى العين, وجع فى الرقبة, صعوبة فى حركة الرقبة,تشنجات
ويتم التشخيص عن طريق عمل صورة دم ومزرعة دم للتاكد من وجود بكتريا فى الدم كما يتم عمل بزل للسائل المحيط بالمخ عن طريق سرنجه
من بين الفقرات القطنية
العلاج:
اهم من العلاج هو الوقاية عن طريق التهوية الجيدة , منع التكدس ,عزل الطفل المصاب عن باقلى افراد العائلة,وكمان فى امصال مضادة للبكتريا , بالنسبة للادوية فيجب اعطاء المريض مضادات حيوية للبكتريا المسببة للالتهاب حسب ماتظهر نتيجة المزرعة بس فى الغالب العيان بياخد( cefotaxime) او بنيسلين

الزئبة الحمراء systemic lupus

ماهو مرض الزئبة الحمراء؟systemic lupus



(autoimmune)هو مرض مناعى
يعنى المفروض ان الجسم فيه جهاز مناعى كالجيش يهاجم اى جسم غريب لكن فى مرض الزئبة بيحصل خلل فى المناعة فيبتدى الجسم يهاجم نفسه ويكون اجسام مضادة ضد نفسه وبيسبب فشل فى كتير من وظايف الجسم
اعراض الزئبة الحمراء؟
نتيجه لوجود اجسام مضادة ضد الجسم نفسه بتحصل التهابات كتير فى الجسم وبتظهر بالذات فى الجلد فبيحصل تساقط للشعر واحمرار فى منطقة حول الانف ومن اشهر المشاكل اللى بيسببها مرض الزئبة الحمرا هو الفشل الكلوى بمختلف مراحلة
مشاكل المرض؟
التهابات فى الكلى والجلد و الاعصاب وارتشاح مياه فى الرئتين والتهاب فى الرئتين التهاب ووجع فى جميع عضلات الجسم
العلاج؟
علاج هذا المرض يعتمد فى الغالب على الادوية اللى بتقلل المناعة او بمعنى اصح بتهدى المناعة وتقلل من هجومها على الجسم وطبعا اشهرها الكورتيزون corticosteroids وفى ادوية تانية بتقلل المناعة زى ازاسيوبريين azathioprine

دوالى الساقين varicose veins

ماهى دوالى الساقين؟
هى ان الاوردة اللى فى الرجل بتنتفخ وتكبروتبقى متعرجة وتبقى باينة بالعين المجردة ولونها ازرق لانها مليانة بالدم
ماهو سبب الدوالى فى الساقين؟
السبب الغالب بيكون سبب وراثى , يعنى حد من العيلة عنده نفس المشكلة وهى ان جدار الشريان بيبقى ضعيف فبيعبى دم وينتفخ او ان فى حاجه بتمنع رجوع الدم مثلا: الحمل بيعمل دوالى بس بتكون مؤقتة او اى مشكلة فى منطقة الحوض
ماهى مشاكل دوالى الساقين؟
المشكله ان الدم لما بيقف كتير فى الاورده بيعمل هرش فيبتدى المريض يهرش جامد وده ممكن يعمله قرح
العلاج:
ده بيعتمد على التشخيص فلو مثلا السبب ضعف فى الوريد بيكون الشراب احسن حل مع رفع الرجل قدر الامكان اثناء النوم اما اذا كان السبب هو انسداد فى رجوع الدم ففى الحاله دى علاج السبب هو الحل

حمى التيفود

حمى التيفود

typhoid fever معنى

حمى التيفود ده مرض بيجى من بكتيريا اسمها سالمونيلا .العدوى بتكون من واحد لواحد عن طريق الاكل الملوث.الشخص اللى بيعدى ممكن يكون حامل للمرض و الاعراض مش ظاهره عليه و يفضل يعدى فى الناس و يا سلام بقى لو شغال فى مطعم.

الاعراض:

بعد ما الواحد ياكل الاكل الملوث اسبوع او شهر الحراره بتبتدى تعلى و بيكون فيه رعشه و وجع فى البطن و امساك مع صداع جامد و مبيرحش الاعراض دى بتبقى لمده اسبوعين و فى الاسبوع التالت الاعراض بتبتدى تقل و الواحد بيتحسن.

عدوى التيفود بتكون مره واحد فى العمر و بعد كده الواحد بيبقى عنده مناعه للتيفود بس ممكن يفضل حامل للمرض و يعدى الناس.

التشخيص بيكون عن طريق الاعراض اللى اهمهم الحراره العاليه و الصداع و ممكن تحليل دم و اختبار فيدالwidal test.

العلاج:

اهم حاجه الوقايه يعنى الاكل لازم يكون نضيف و المريض لازم يتعزل لحد ميخف و فيه كمان تطعيمات ضد التيفود.

العلاج بيبتدى بالراحه فى السرير و الاكل الخفيف و خافضات الحراره و المسكنات للصداع و المضادات الحيويه اللى اشهرهم سيبروفلوكساسين ciprofloxacin لمده اسبوعين مرتين فى اليوم.

مرض نيفروتيك

مرض النيفروتيك

متلازمه النيفروتيك

معنى nephritic syndrome

ده مرض بيجى فى الكلى.اولا الكليه عامله زى المصفى اللى بتصفى الم و تنقيه اللى بتعدى حاجات و مبتعديش حاجات و فيه حاجات ممكن تعدى من الكليه لكن الكليه بتمتصها تانى.

فى مرض النيفروتيك فتحات المصفى اللى فى الكليه بتوسع فبتعدى بروتينات منها(الطبيعى البروتينات متعديش من الكليه )فالبروتين فى الدم بيقل و بيظهر زلال (بروتين)فى البول.

المرض ده غالبا بيجى للاطفال اكتر من الكبار و بيكون نتابجوا فى الاطفال احسن من الكبار .

الاعراض:

اهم عرض ورم و انتفاخ حوالين العينين و ممكن بعد كده الرجلين و باقى الجسم يورم.

و من التحاليل نلاقى البروتين قل فى الدم و الزلال زاد فى الدم و الدهون زادت فى الدم و فى البول.

تشخيص نيفرونتيك بيكون من الاعراض و تحليل الدم و البول و وظائف الكلى اللى بتكون طبيعيه

العلاج:
اكل فيه بروتين كتير و مفهوش ملح خالص عشان الورم يقل و مدرات البول عشان تخف الورم و العلاج الرئيسى كورتيزون و مخفضات المناعه لمده 6 شهور عشان السبب الرئيسى للنيفروتك فى الاطفال ان مناعه الجسم بتهاجم الكليه و السبب الرئيسى فى الكبار السكر و الذئبه الحمر.و فى الاطفال نتيجه العلاج بتكون كويسه اوى.

خراج الكبد الاميبى

التهاب الكبد الاميبى

خراج الكبد الاميبى

amoebic liver abscess معنى

ده مرض موجود فى مصر كتير و ده بيجى لواحد عندو اميبا فى امعائه(زى معظم المصريين)بس ده بقى الاميبا راحت للكبد و عملت فيه التهاب اللى ممكن يعمل خراج.

الاميبا بتيجى من الاكل الملوث فعشان كده المرض ده بيجى للرجاله اكتر من الستات و للشباب و الاطفال اكتر.

الاميبا الاول بتصيب القولون و بتجيب مغص و امساك و اضطرابات فى الامعاء(الطبيعى بعد ما تاكل اكله ملوثه).

بس لو الاميبا راحت للكبد و عملت فيه التهاب فحراره الواحد بتعلى و بيبقى لونه بهتان و مش عايز ياكل و نفسو بتغم عليه و وزنه بيقل و جنبو اليمين مكان الكبد بيبقى وجعوا.

خراج الكبد الاميبى بيتشخص من الوصف و الاعراض غالبا و ممكن الدكتور يطلب تحليل براز االى اكيد هيكون فيه اميبا و سونار على الكبد عشان يشوف الخراج.

العلاج:

علاج خراج الكبد الاميبى بيبقى اقراص ميترونيدازول (فلاجيل) (flagyl) تلات مرات فى اليوم لمده عشر ايام.

و لو بعد خمس ايام من العلاج العيان مبتداش يتحسن او لو كان الخراج كبير ممكن الدكتور بابره يسحب الصديد من الخراج عشان يساعد المضاد الحيوى .

الالتهاب الرئوى

معنى pneumonia

ده التهاب فى انسجه الرئه وده ممكن يجى لاى حد من العدوى عن طريق رزاز فيه الميكروب اللى غالبا بيبقى باكتيريا لكن ممكن يكون فيروس. والعدوى من واحد مش لازم يكون عنده التهاب رئوى لكن المهم انه يكون عنده الميكروب ممكن حتى يكون عنده التهاب فلى الحلق او ميكونش بيشتكى من حاجه ويعدى واحد ويجيلوا التهاب رئوى.

وايه هياالاعراض؟

الاعراض تكون حرارة عاليه وصداع وتكسير فى الجسم فالواحد ممكن يفتكر دور برد شديد حبه لكن بيكون معاها صعوبه فى التنفس ووجع فى الصدر مع التنفس العميق وكحه تكون الاول جافه وبعدين يبقى معاها بلغم.

الالتهاب الرئوى كان بيتسمى زمان حمى السبع ايام لان الواحد غالبا كان بيخف بعد سبع ايام.

الالتهاب الرئوى بيتشخص من الاعراض او اشعه الصدر وممكن كمان يتطلب مزرعه بلغم عشان يعرف نوع الميكروب ويتاخد مضاد حيوى يناسبوا .

العلاج:

راحه فى السرير طبعا واكل كويس وبرتقال ولمون وحاجات دافيه وكلام من ده والمضادات الحيويه يتاخد حسب المزرعه لكن معظم الدكاترة بتدى مضاد حيوى واسع المجال يعنى يشتغل على البكتريا كتير واكتر مضاد حيوى بيستخدم هو((Augmentin

لمده اسبوع ده غير ادويه للكحه والحرارة ومسكنات.